عاودي آ شهرزاد: الحلقة ستطاش – هَاكَّا مامّا… اعْطِي لمامّا

عاودي آ شهرزاد
مذكرات بنت الشعب في الجامعة الفاضلة
عنوان الحلقة

Episode_016

بستيلو وصوت: عفيفة البيض

 

“آشناهو الراجل؟ الراجل حيوان ناطق مكون من شعيرات وجليدات وعضيمات ولحيمات وشحيمات وهبيرات ومليجات ولابس حويجات ولكن ماهيته يمكن اختزالها في فمه ويده وتحزيمته. وقد وُجِد هاد المخلوق باش يوَنَّس المراة ويلاهيها شوية، حيت هي نيت ما عندها ما يدّار على سطح الكرة الأرضية. وكون الكون دقيق فتكوينو، ماهية الشيء كتكون في كتير من الأحيان مسخرة لخدمة سبب وجوده.

فم الراجل هو اللي كيسمح ليه يونسك سيدتي بشوية ديال الكلمات الزوينين. وبما أن الله فضل بعضكم على بعض فالرزق، كاين اللي غتلقايه جهدو دواوين محمود درويش ولا نزار قباني، ولا غتلقايه كيكوفش ليك غير من داكشي اللي مغنيه كاظم الساهر. وكاين اللي غيحفر ويقرا لك من الشعر الجاهلي ولا العيطة الحصباوية والمرساوية ويشرحهم لك گاع. فضّلي هاد النوعية التانية أختي الفاضلة وطلعي النيڨو جازاك الله ألف خير. وفم الراجل هو اللي كيسمح ليه ياكل… الماكلة بطبيعة الحال. الراجل الدواق پاغ ديفينيسيون هو اللي ما عندو دوق؛ اللي يقدر ياكل الطياب ديال كوغدون بلو وپوكاديوس شي مصطفى. الفم المزيان هو اللي تسمعي ليه (شششششش مسروطة) فشريب آتاي بالنعناع العبدي واللي يقطع الحس مللي يشرب سوپ سان جاك. فم الراجل مهم حيت هو اللي كيعكس انتقائيتو فگاع اللي خاصوا الانتقاء وهرگاويتو فالباقي. فم الراجل هو اللي يقدر يعكس ليك العود اللي فيه والحلوف اللي يقدر يخرج منو.

علاش الراجل عندو اليدين؟ باينة، غير باش يعجبوك انتي. قوة استعمال اليد فتلت ارباع الحركات ديالو كتخليهم فالواجهة. وواخة يعمى لك البصر تشوفهم لك البصيرة. الراجل اللي واكل ضفارو حيد بالاك ما عندك ما تديري بيه، راه ما كاينش اللي كياكل لحمو بلا سبب. اللي ضفارو مسخين ما يصلاحش لك، خاصة إلا جاية من بلاد مخيطة ببحر ومحيط وشلا وديان. اللي مقطع ضفارو على شكل خط مستقيم ما يكسابش الدوق، ما دام هو اللول قادر يشوف فيهم هكاك النهار وما طال. اللي دارالمانيكير (وراه كتروا فالبلاد هاد اليامات) اختك حليمة، ولك فيه أسوة حسنة، أما إلا كتقلّبي على شي حاجة اخرى راكي غالطة فلادريسة. اليد خاص يكونوا ضفارها مضورين ومقوقعين من الجنيبات كيما بغاتهم الطبيعة. والصباع يكونوا متوازيين، إلا تحركوا يكونوا أون هارموني، ماشي صبع حاضي الحنش ولاخر ماشي يقلب على الحجرة. انسيابية الراجل والفليكسيبيليتي ديالو وقدرتو على التأقلم مع جميع الضروف توريهم لك يدو. داكشي علاش اليد هي أكبر شاهد على تجريبتو وخبرتو فالحياة، فيها كيبان البهگ اللول، فيها كيشدوا التجاعيد اللي ما كتحيدهومش الشيريرجي، فيها كيبقاوا السيكاتريسات الشاهدة على إنجازاتو السابقة فميدان وناسة بنات امنا حَوَّا.

الراجل هو تحزيمتو. الناصل غالبا على علاقة مع اختك حليمة، قلبي عليه. اللي سمتطو طالعة لا يغدو عن كونه إين غيينكاغناسيون ديال فريد الأطرش (إلاّ إلا كان كيعجبك فريد الأطرش، هداي عليا عوتاني). التحزيمة اللي شادة من الجناب فيكس، مستقيمة من اللور، ناصلة من القدام هي المعيار، وعليها كتقاس الشخصية دالراجل. إلا بغيتي طرطور بعدي من هاد الفصالة، وإلا بغيتي شي رشدي أباضة ولا جون دي جاردان عليك بيها. وللعلم، هاد الفصالة ما كاتصدقش بلا كريشة، والقاعدة تقول غرام ديال الكرش احسن من والو، وفي رواية أخرى الراجل بلا كرش غير إشاعة. لا تبقايش تابعة ليا الله يرضي عليك دوك الفصالات ديال عصر النهضة. هاداك التمتال ديال داڨيد اللي غسلو ليكم بيه الدماغ راه راسمو مثلي وشهوتو فالغلمان. “الراجل هو التحزيمة”، قالوها لالياتنا ايام زمان، حيت كانوا عارفين ليگو ديال الراجل فين مخبي. وراه الراجل الحقيقي كيكون واعي على هاد الحقيقة. والواعرين اللي ما خطاتهمش لولا وما عطاهمش الله هاد التحزيمة، كيكونوا كيفتاعلوها فصغرهم، حتى كيكبروا وتخرج الكريشة ويجيب الله التيسير.

من اليوم فصاعدا ركزي مزيان سيدتي، وما تضيعيش الوقت فالعينين والنيف والصدر والبقية، هادشي راه الغرض منو غير التشويش أوالتمويه أو هما بجوج. حطي عينيك على الفم واليدين والتحزيمة، وإلا داهمك عنصر الوقت، شوفي انتي غير التحزيمة، حيت التجربة علماتني، أن هادي مللي كتكون زينة، كتضمن ما سبق!

وبه تم الإعلام، والسلام.”

طاپيت العجب، أمپريميتو وعطيتو لدجونسون فتاني حصة شفتها فيها.

قوقوووووووووعوووووووووووو

رومارك:
گاع الأحدات والشخصيات ديال هاد السلسلة جبتهم غا من راسي. واِلا فكراتكم فشي حاجة ولاشي حد، داكشي راه غير كوانسيدونس.

Banner_Blog_002

What do you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s