عاودي آ شهرزاد: الحلقة طناش/الطانشة – حْتَى زِينْ مَا خْطاتُو لُولَا

عاودي آ شهرزاد
مذكرات بنت الشعب في الجامعة الفاضلة
عنوان الحلقة

Episode_012

بستيلو وصوت: عفيفة البيض

 

ودخلت عند الدكتور شكيب، وهو يهز دراعو حتال السما وحطها للارض واعتدر مني. قال ليا ضارو كتفو بزاف والكيني قال ليه كلا 20 دقيقة يهزدو حتال السما 20 تانية ويرجعو للارض. قلت ليه ماكاين مشكل وفعلا تفهمت الموقف، ومرگت گاع. السيد شفتوا بنص عين 20 دقيقة قبل ودرت فيلم كامل وكنت علاين غادي ندخلو للحبس فدماغي، وهو صدق غير معنّج. جيت نهضر معاه وهو يضحك، وانا نتبلوكا. عاودت جيت بغيت نبدا جملة، ضحك وانا نتكوانسا. يــــــاربي! واش انا عشاقة الزين، تضل تطيحو ليا فعشاتي! قال ليا السيد تكالماي، وبردي وفكري مزيان عاد دوي، وانا نسمع كلامو: تكالميت، بردت مزيان، فكرت… وما لقيت ما نقول ليه: آش جابني أنا هنا أصلا؟ جاية نحيد كور على قبل أستادة واقيلا والله أعلم قالوا ليا ما مزياناش؟! هادي ما تقالش! وإلا كان المتكلم احمق، المستمع يدير غير نص عقل ويقرق عليه. وانا نجي للسيد ديركت (بالحق بلا ما ندقق فيه، باش ما ندوبش):

– شوف آ دكتور. أنا راني جديدة هنا. ها هاد البطاقة ديالي (هو هنا تفرشخ بالضحك… وبالجهد)*. راه هاد لي كور بزاف عليا. والطلبة كياخدوا غير خمسة. وراه بغيت نحيد واحد. وما كرهتش نحد هادا (وانا نشير لديال دجونسون)!
– آح… أنا بغيت نعرف غير كي كيديروا يلقاوكم؟
– پاردون؟
– صحاب الحسنات. انت باقية جديدة وبنت ضاركوم وباين فيك المعقول وباغية تقراي، ودغيا تطلاوا بيك صحاب الحسنات وقالوا ليك حيدي الكور ديال دجونسون، وعطاوك CV ديالها وقيلا گاع، ياك؟!
– ما فهمتش؟! (وانا فقمة تأدية دور إعمل عبيط).
– شوفي آ بنتي. انتي حرة ، تيقي فيما بغيتي وسمعي لمن ما بغيتي. ولكن أنا نجيك من اللخر. هاد الكور ديال دجونسون كيعلمك أبجديات كتابة النص الأكاديمي وخاصك تاخديه، باش يولي عندك الحق تاخدي كور آخر من بعدو، والا ما خديتيش هادا عمرو ما يولي عندك الحق تقراي لي كور ديال التخصص ديالك. إدن إلا حيدتيه هاد السومستر، راه بقيتي هنا. جهدك تبدلي السكسيون ديال دجونسون. ولكن أنا من هنا نقول ليك، راه حتى سيكسيون من غير ديال دجونسون ما غادي تلقايها خاوية! واش فهمتيني ولا لا؟ أما إلا فعلا انتي غراضك غير تحيدي كور زايد عليك باش تخففي، حيدي هاداك الكور ديال كومبيوتر ساينس. هادا غير كور ديال الجدع المشترك، خاص گاع الطلبة ياخدوه باش يزيد من درايتهم ومعرفتهم فمجال من بزاف ديال المجالات الخارجة على التخصص ديالهم. ولكن راه غادي يبقى تابعك تابعك! شوفي انتي واش تاخديه فاللول وانتي باقية خفيفة، ولا تخليه حتى تدخلي للمعمعة الكبيرة ديال لي كورديال علوم الإعلام والتواصل. وانتي تعرفي!

پشاخ… سيد الحاج الزين زين، ولكن حتى حروف الدنيا قاريها، وعارف تحراميات الطلبة. والا كنتي مطور أوليدي، راني شهرزاد بطال وأجرك عالله. الفيلتر زرق موجود، نركبوا عليك من 20 كيلومتر حتى تولي كي عيالات طالبان. يالله بديت كنتصور شكيب شكيب جوج مترو طول على واحد ونص عرض ممتل فشي سين بحال ديال الطريق إلى كابول، و هو يقول ليا:

“وا سيري ضربي شي ضويرة وفكري مزيان فهاد الشي اللي قلتو ليك، و ملي تقرري رجّعي عليا الخبار. عندك من هنا حتال آخر السيمانة باش تقرري . وانا ديما تلقيني هنا فلأوفيس أورز. والا فيك ما تسمعي شي نصيحة اخرى، ما تقرري حتى تدخلي عند دجونسون. اعطيها فرصة، حيت كل واحد كيستحق تعطاه واخة غير فرصة وحدة فالحياة. ومن هنا لتماك، سيري بدلي الساعة باخرى، جلسي فمطعم السلام، تأملي فالناس، وشوفي إيلايتماس بحالا راكي جاية هنا غير ويكاند ما حدك باقية تقدري تديري هاد ليكزيرسيس.”

جمعت حوايجي وخرجت من عند شكيب مكرهة حيت أولا، ما قضيتش غراضي كيما بغيت؛ تانيا، حيت بان عليا ما قاضياش غراضي وانا قدام العالام اللي كيتسناه؛ تالتا، حيت كنت ما زال ما وليتش بنت الجامعة الفاضلة حقيقية باش نعرف ختى أنا كيفاش نعربط على عمو شكيب؛ رابعا، حيت واقيلا كتاب عليا نتلاقى مع دجنسون والعياد بالله نقرا عندها گاع؛ خامسا، حيت ما عرفتش أشناهي أوفس أورز؛ وسادسا وأخيرا، حيت كلام الزين المسرار كينبأ بمجيان شي نهار ما غاديش نبقى نشوف فيه إيلايتماس بحالا جايا ليها غير ويكاند.

رومارك:
گاع الأحدات والشخصيات ديال هاد السلسلة جبتهم غا من راسي. واِلا فكراتكم فشي حاجة ولاشي حد، داكشي راه غير كوانسيدونس.

* البطاقة ديال الطالب فالجامعة الفاضلة واخة فيها معلومات على الطالب، راه ما صالحة غير لباش تخلص بيها فالريسطو ولا على شي تنبر لشي وتيقة إدارية. هداكشي علاش تفرشخ السي شكيب بالضحك مللي عطيتها ليه، حيت بحالا مشيت لكوميسارية وعطيت لشي موضف كارت گيشي فبلاصة بطاقة التعريف الوطنية.

What do you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s