عاودي آ شهرزاد: الحلقة العاشرة – الهْرُوبْ فْالتِّيساعْ رَجْلَة

عاودي آ شهرزاد
مذكرات بنت الشعب في الجامعة الفاضلة
عنوان الحلقة

Episode_010

ملحوظة: الرّجلة ماشي هي المروّة 😉

بستيلو وصوت: عفيفة البيض

 

واخة بزاف ديال الأساتدة كانوا كيمشيوا ويجيوا خطي بطي على الجامعة الفاضلة، الناس اللي على شاكلة الدكتور الحميدي واخوتو الأساتدة ديال العربية الخرين ما كانوش قلال. الأساتدة اللي اتبنى معاهم الساس ديال الجامعة ما كانش بيناتهم عامة شي قاسم مشترك. كانوا من گاع الجنوسة والملل وفيهم العيالات والرجال. خير متال على العجب اللي ممكن تلقى فهاد الكاتيگوري هو الدكتورة دجونسون. دجونسون مريكانية نصرانية، مشات قرّات فمصر، ضربت شي دويرة فسيدنا الحسين والسيدة زينب، وهو يقول ليها راسها سلمي، وما لقاهاش من العاجزات. ضرباتها بسلمة ولبسات الحجاب. وا حجاب وآش من حجاب لبسات… كلّو متقّب. الفولار مشدود واحد الشدة مغربية قحة (ماشي ديال الخرجة من الحمام وإنما ديال عقدة مرخوفة فوق الجلابة)… هاد الشدة أصلا كتخلي نص العنق خارج، وهي كان عندها واحد العنق بِيوّض كي الحليب، كيشهي. كانت كتلبس قميجة خفيفة مهلهلة قصيرة وزايداها بالفتحات فالجناب من الفوق، وجوپّة طويلة بالحق ماشي حتى للّرض وبينها وبين قدمها أقل ما هو 10 سنتيم باش ما تعكلش، وفرجليها ديما صباط حربي ديال التكرفيص. خلاصة القول، السيدة كانت كتلبس لباس مريح ومحترم، كتحدى بيه بصمت علماء بلادستان، ديال لايصف ولايشف والزيادة من راس الحمق، واللي خاص يشوفوا المرا مكوغطة ومعنكشة مزيـــــان عاد تبان ليهم عاجبة الله، حيت ما غاديش تبقى عاجبة بحمده وقوته ديك الساعة حتى شي بنادم على سطح الكرة الأرضية.

ومع العلم أن دجونسون – واخة ميريكانية – عندها قلدة التكشيطة بامتياز، خاصك تكون مريض فدماغك باش يبان ليك فيها شي إغراء. واخة وجهها بِيوّض وملحّم وطفولي بحال شي حليليفة مرسومة بحنان وإتقان فشي رسوم متحركة، وواخة عينيها ازرق من لون السما والبحر، ما كانش يخطر على بال شي بوقال يتبسل عليها، إلاّ إلا رخاص عليه عمرو وفكر يرمى راسو قدام آلة حربية ملاقية مع شي رموك فلوطوروت باش تكروازا ليه التقطيعة تم تم. مللي كنت كنشوفها شي مرات كنت كنسرح فشكلها وفمشيتها وداك العجب اللامرئي اللاموصوف اللي كيخرج منها وكيعكس شخصية كولونيل ماجور فسيفت امرا وقرطاسة. كنت كنقول ماشي من قليل أن إيلايتماس من أقل المدن فالمغرب اللي كترتكب فيها الجرائم. هادي عايشة هنا اكتر من سبع سنين، إلا خرجات غير تلاتة دالمرات فالسيمانة للمارشي، الأمن مضمون حتال على بعد 10 كيلومتر من البلاصة اللي غتكون واقفة فيها. كنت كنبَوَّز غير لوليداتها، وكنتساءل غير كيكيديروا يعيشوا معاها. كنقول فخاطري هادو مساكن هما المعدبون فالأرض. تخلاوا عليهم والديهم البيولوجيين فشي خيرية وهما صغار، ونهار جا شي حد يربيهم ما جات غير هادي. ربي سلّم رقابهم، هم بنو المغرب، لبنادمة كروازية، مريكانية وسالمة، معرية ومغطية، قرطاسة وكولونيل ماجور… والصراحة، صعيبة تكون مّك بحال هكاك!

ومن هاد الهبال كلو، خاصكم تعرفوا أنني بعدا وصلتني خبارها قبل ما نشوفها ولا نعرفها. والطامة الكبرى هي أن الخبار اللي وصلاتني عليها كفس واطلس من الانطباع اللي عطاتني نهار شفتها. السيدة قاللك ما كتعرفش تشرح ومكلخة ومعقدة ومتحيزة وبوغني وبّاها ديال الفرزيات. ما عمرها كتغيّب حيت بحال هادي ما كيمرضوش والعياد بالله. أما النقطة فكتعطيها بحالّا كتجبدها من جيبها. والإدارة ديال الجامعة الفاضلة بكل تقة فالنفس بغاوها تقريني فالسومستر اللول ديالي. معا بنت ليهم جديدة ودمدومة باقية ما عارفة والو عطاوها ليا، حيت عرفوا گاع الطلبة القدام سامعين عليها حتى داخوا ونهار كيبغيوا ياخدوا الكور اللي كتقريه كيديروا أغرب استعمال زمان فالعالم غير باش ما تقريهمش، وياخدوا نفس الكور عند شي واحد اخر من غيرها. أما اللي جايين جداد ودمادم بحالي متاليين باش تقرم عليهم المصيدة. ولكن الحمد لله كان عندي الزهر، وتلاقيت مع واحد القيدومة كانت كتعرف لمياء ومسكينة كان عندها بحال مشكيلتي، حيت اختارت سكسيون عند واحد الأستادة اخرا، ولكن حيت عمرات خشاوها فالكور ديال دجونسون، حيت فاستعمال الزمان ديالها كانت الوقيتة ديال السيكسيون ديال دجونسون خاوية. لقيتها هي النيت ما حاملاش هاد الديكور ومضاربة قالت ليك باغية تضروپي الكور. أنا بطبيعة الحال، ما فهمتش آشناهي تضروپي اللي قالتها وانا نسولها آش هاد العجب، وهي تجاوبني بواحد المونولوج طويل عريض:

“تضروپي كور هي تحيديه من استعمال الزمان باش ما تقرايهش فهاد السومستر، وتخليه لمن بعد. والا ما بغيتيش تعطلي فقرايتك، تقدري تآدي كور فبلاصتو، يعني تزيدي شي كور باقي تابعك فاستعمال الزمان باش تقرايه فهاد السومستر. آري بعدا نشوف شحال عندك ديال لي كور… أواه ستة، راهم بزاف… كلا واحد كتقرايه تلاتة دسوايع فالسيمانة عالأقل، وكيخصك تخدمي ليه من 9 حتال 12 ساعة فالسيمانة بوحدك، حيت الأستاد هنا ما كيعطيكش كلشي، خاصك شحال من حاجة تخدمي فيها على راسك… المهم، هادشي كايبان ما صعيبش بزاف على العموم إلا هاد الكور ديال كمپيوتر ساينس كيبغي شوية ديال الدكاء وزايد عليه الكور ديال دجونسون ولكن غير حيت دجونسون هي اللي مقرياه. وانا منك نضروپي واحد فيهم ولا بجوج گاع، راه عاد بديتي ومازال عندك الوقت… آجي بعدا، شكون الأدڨايزر ديالك؟ آه… حيت إلا بغيتي تدروپي شي كور راه عرام ديال الناس خصهم يسنيوا لك الموافقة باش ما يخلوكش تديري شي تسطية غا رّاسك وأولهم الأدڨايزر ديالك. ورّي ورّي ديك الورقة الاخرا… هاديك هاديك… أييــــه… آه الأدڨايزر ديالك هو شكيب شكيب. وا سيـــري عندو وقولي ليه يتساعد معاك باش تفكي هاد الجرة”.

ختنا مللي سالات هاد المونولوج، راه بحالّا ضربات بيا فران كوسِك فشي ڨيراج. وما عرفت باش تبليت وشداتني الضحكة، وأنا اللي عالمة فتخبيتها والله حتى تحنسرت. وا ناري سحاب ليا أنا جايّة لشي مغرب آخر مللي دخلت للجامعة الفاضلة… وتّا راه المغرب غا مغرب فينما مشيتي… وا ربي ها “آدي”، ها “ضروپي”، الأدڨايزر، السومستر… وراه حنا الشعب الوحيد اللي كيدخل الكلمات من لغات اخرى للدارجة ويجلس من نيّتو يشكل فيهم. ما علمنيش الله أنني باقة غادة نسمع “نپرينتي”، “نسكيپي” و”سلاش إگنور” إلخ إلخ. شعب عادل الميلودي بامتياز، وحتى شْريكْ ما خلّيناهش فالتيقار. وا بُركان قد ما مايلو فإسلاندا ما قلناهش؛ العالم كامل يتلعتم فسميتو وحنا رضّيناه “آهيا جات فجلال والجقلّة”*.

جمعت الضحكة وفلّتت منها غير شي شوية باش نبان للسيدة زعما غير فرحانة حيت عاوناتني، وحيت فعلا كان عندي علاش نفرح نيت. هاد الحل اللي اقتارحاتو عليّا هو خير متال لضرب عصفورين بحجر: ورّاتني كيندير نتهنّى من دجونسون وفنفس الوقت نصِل الرّحم مع العزيز الغالي؛ السي شكيب شكيب. وقلت فخاطري: “أنا لها”.

رومارك:
گاع الأحدات والشخصيات ديال هاد السلسلة جبتهم غا من راسي. واِلا فكراتكم فشي حاجة ولاشي حد، داكشي راه غير كوانسيدونس.
وما توقفوش عند ويل للمصلين.

* البركان الإسلاندي هوEyjafjallajökull، وكان تشهر من بعد ما انفاجر ف2010 بسبب حجمو وخسائرو ولكن حتى بصعوبة القراية ديال سميتو.

What do you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s